जितमा सोमपाल सन्तुष्ट

सोमपाल कामी एकदिवसीय अन्तर्राष्ट्रिय क्रिकेट खेलमा ५ विकेट लिने नेपालको पहिलो बलर बनेका छन् । दायाँहाते तीव्र गतिका बलर उनी आफ्नो व्यक्तिगत प्रदर्शनभन्दा पनि टिमले जितेकोमा बढी खुसी थिए । उनको प्रदर्शनमा नेपालले शनिबार दोस्रो खेलमा यूएईलाई १ सय ४५ रनले पराजित गरी शृंखला १–१ को बराबरीमा ल्याएको छ ।

नेपालले गत वर्ष अगस्ट १ मा नेदरल्यान्ड्ससँग एमस्टलभिनमा एकदिवसीय अन्तर्राष्ट्रियमा ‘डेब्यू’ गर्दा पारस खड्काले पहिलो खेलमै ४ विकेट लिएका थिए । लेग स्पिनर सन्दीप लामिछानेले एसिया कप छनोटमा यूएईसँगैको खेलमा पनि ४ विकेट लिएका थिए । तर कुनै नेपाली बलरले एकदिवसीय अन्तर्राष्ट्रियको एकै खेलमा ५ विकेट लिने कीर्तिमान बनाउन सकेका थिएनन् । सन्दीपले शनिबारको खेलमा पनि ४ विकेट लिए ।

दुबईस्थित आईसीसी एकेडेमी ओभल मैदानमा सुरुआतमै सानदार बलिङ गर्दै सोमपालले उक्त कीर्तिमान आफ्नो नाममा लेखाउन सफल भए । उनले आफ्नो ओपनिङ स्पेलमै यूएईका ४ ब्याट्सम्यानलाई आउट गरे । नेपाल जित निश्चित भएको अवस्थामा उनले अन्तिम विकेट लिँदै ५ विकेटको कीर्तिमान बनाएका हुन् ।

‘म खुसी छु तर ५ विकेट लिएको भन्दा पनि टिमलाई जिताउन सकेकाले अझ सन्तुष्टि मिलेको छ । पहिलो खेल हारेकाले हामी राम्रो स्थितिमा थिएनौं र हामीमाथि दबाब पनि थियो,’ सोमपालले कान्तिपुरसँग भने ।

सोमपालले ६.३ ओभरमा १ मेडन राख्दै ३३ रन खर्चेर ५ विकेट लिएपछि २ सय ४३ रनको लक्ष्य लिएर आएको यूएई १९.३ ओभरमा ९७ रनमा अलआउट भयो । पहिलोपल्ट नेपालले एकदिवसीय अन्तर्राष्ट्रियमा विपक्षीलाई एक सयमुनिकै स्कोरमा अलआउट गर्‍यो ।

‘निश्चय पनि जितले धेरै खुसी र उमंग ल्याउँछ । आज निकै उत्कृष्ट खेल्यौं । हाम्रा लागि पहिला १० ओभर निकै महत्त्वपूर्ण थियो, त्यस हिसाबमा ओपनरहरूले संयमित भएर खेले र आधार बनाए । त्यसपछि सबैले केही न केही योगदान दिएँ । रोहित (पौडेल) ले सुन्दर ब्याटिङ गरे, सोमपालको पहिलो स्पेलले नै खेल हाम्रो पक्षमा ल्याइसकेको थियो,’ कप्तान पारसले भने ।

ज्ञानेन्द्र मल्ल र विनोद भण्डारीले पहिलो विकेटमा ६१ रन जोडेका थिए । एकदिवसीयमा नेपालको यो सबैभन्दा राम्रो सुरुआत हो । नेदरल्यान्ड्ससँगको पहिलो एकदिवसीयमा ज्ञानेन्द्रले अनिल साहसँग ५८ रन जोडेका थिए । अन्तर्राष्ट्रिय क्रिकेटमा सबैभन्दा कम उमेरमा अर्धशतक बनाउनेक्रममा रोहितले आरिफ शेखसँग छैटौं विकेटमा ८२ रन जोडे । एकदिवसीय अन्तर्राष्ट्रियमा नेपालको यो सबैभन्दा ठूलो साझेदारी हो । ज्ञानेन्द्र ४४, विनोद र पारस समान २१, आरिफ २९ तथा रोहितले ५५ रन बनाए ।

‘शृंखला अझ खुला र रोचक भएको छ, हामी अन्तिम खेलको प्रतीक्षामा छौं । खेलाडीहरूले पनि मिहिनेत गरिरहेका छन् । हाम्रो टोली निकै युवा छ र हामी धैर्य हुनुपर्छ । आशा गरौं हामीले यस्तै जितलाई निरन्तरता दिनेछौं,’ पारसले भने ।

स्रोत : कान्तिपुर

Leave a Reply

Your email address will not be published. Required fields are marked *