महिला फुटबलमा भारतविरुद्ध नेपालको पहिलो जित

go to this web-site नेपाली राष्ट्रिय महिला फुटबल टोलीले भारतविरुद्ध उसकै भूमिमा ऐतिहासिक जित निकालेको छ । भुवनेश्वरमा जारी हिरो गोल्डकप फुटबलमा घरेलु टिमविरुद्ध पाएको २–१ को जित नेपाली महिला फुटबल इतिहासमै पहिलो हो । 

कालिंगा अन्तर्राष्ट्रिय रंगशालामा सोमबार सुरुआती ७ मिनेटभित्रै २–० को अग्रता लिएको नेपालले भारतलाई खेलमा फर्कने अवसर नै दिएन। दुवै गोल मुख्य स्ट्राइकर सावित्रा भण्डारीले गरेकी हुन्। पाँचौं मिनेटमा हीराकुमारी भुजेलको पासमा सावित्राले भारतीय गोलरक्षक आदिती चौहानलाई छक्याउँदै गोल गरिन्। त्यसको दुई मिनेटपछि सावित्राले नै मनमाया लिम्बुको क्रस सदुपयोग गरेकी थिइन्।

खेलको अन्त्यतिर भारतले एक गोल फर्कायो। रत्नावाला देवीले ८४ औं मिनेटमा फ्रिकिकमार्फत गोल गरेकी थिइन्।

भारतको सिनियर टोलीविरुद्ध नेपालले नवौं खेलमा पहिलो जित निकालेको हो। यसअघि ७ खेलमा पराजित नेपालले एक खेल बराबरीमा रोकेको थियो। यसअघि सन् २०१० को ११ औं दक्षिण एसियाली खेलकुद (साग) को समूह चरण र फाइनलमा पराजित भएको नेपालले त्यही वर्ष साफ च्याम्पियनसिप फाइनल पनि भारतसँग पराजित भएर गुमाएको थियो।

सन् २०१२ र २०१४ को साफ च्याम्पियनसिप फाइनलमा नेपाल फेरि भारतसँगै पराजित भएको थियो। सन् २०१६ मा भारतमा सम्पन्न १२ औं सागको समूह चरणमा गोलरहित बराबरी खेलेको नेपाल फाइनलमा भने पराजित हुँदै स्वर्ण पदकबाट चुकेको थियो। सन् २०१६/१७ मा भएको साफ च्याम्पियनसिपको सेमिफाइनलमा पनि नेपालले भारतसँग हार बेहोरेको थियो।

सोमबारको यो जितले चार टोलीसम्मिलित हिरो गोल्डकपमा नेपालको फाइनल पुग्ने सम्भावना पनि जीवितै भएको छ। नेपालले शनिबार पहिलो खेलमा म्यानमारसँग ३–० को पराजय बेहोरेको थियो।

सबै टोलीले २–२ खेल खेल्दा म्यानमार दुवैमा जित हासिल गरी ६ अंकसाथ शीर्षस्थानमा छ। समान एक जित र एक हारको नतिजा भए पनि हेड टू हेडमा नेपाल दोस्रो र भारत तेस्रो स्थानमा छन्। सोमबारै अर्को खेलमा म्यानमारसँग इरान २–० ले पराजित भएको थियो। इरानले पहिलो खेलमा भारतसँग १–० को हार बेहोरेको हो।

फाइनल पुग्न नेपालले बुधबार हुने समूह चरणको अन्तिम खेलमा इरानलाई हराउनैपर्नेछ। तर, भारतले म्यानमारसँग पराजय बेहोरेको खण्डमा नेपाललाई बराबरीको नतिजा पनि पर्याप्त हुनसक्छ। इरानले नेपाललाई हराएमा वा भारत म्यानमारसँग पराजित भएको खण्डमा तीन टोलीको समान ३ अंक हुनेछ। गोलअन्तर आधारमा फाइनल पुग्ने टोलीको टुंगो लाग्नेछ।

स्रोत : कान्तिपुर

Leave a Reply

Your email address will not be published. Required fields are marked *